Ք․ Երևան, Աբովյան 48 +374 43 004001 bigprojectsarmenia@gmail.com

Ժամանակի կառավարում բիզնեսում

1 Հունվարի, 2021 Narine Gevorgyan Comments Off

Ժամանակի կառավարման մի քանի հնարքներ, որոնք որակապես ազդում են ձեր արդյունավետության վրա։ 

1․ Փորձեք դասակարգել ձեր աշխատանքները։ 
Ստեղծեք ձեր աշխատանքների ցանկը և սահմանեք դրանց կարգավիճակները։ Որոշեք, թե ո՞ր ընթացքում են գտնվում այդ աշխատանքները, կատարված ե՞ն դրանք թե ոչ, ընթացքում են թե՞ պլանավորում եք սկսել։ Տեսակավորեք դրանք ըստ բաժինների, օրինակ՝ ներառեք հաշվապահության, մարքեթինգի կամ վաճառքի մեջ։ Վատ չէր լինի դրանք գրանցել որևէ կառավարման համակարգում, եթե ունեք այն, քանզի կառավարման համակարգերն արդեն ունեն բոլոր անհրաժեշտ գործառույթները` աշխատանքներն արդյունավետ վերահսկելու համար։ 

2․ Սահմանեք աշխատանքների համար հստակ ժամկետներ և եղեք իրատես։
Յուրաքանչյուր աշխատանք պետք է ունենա ժամկետ։ Մենք ավելի արդյունավետ ենք, երբ գիտենք մեր առջև դրված ժամկետները։ Շատ կարևոր է սահմանել իրական ժամկետներ և հետևել դրանց։ Հետևեք Պարկինսոնի օրենքին․ մի տրամադրեք որևէ աշխատանքի համար ավելի շատ ժամանակ, քան պահանջվում է և կատարեք այն սահմանված ժամկետում։ Սահմանեք նաև աշխատանքների առաջնային կամ երկրորդական բնույթը։ Եթե որոշել եք փնտրել որևէ մասնագետի, կազմել թիրախ հաճախորդների ցանկը կամ մշակել որևէ տեքստ, ապա ցանկալի է առաջինը զբաղվել այն աշխատանքով, որով պայմանավորված է ձեր պահանջարկը։ Կատարեք կարճաժամկետ աշխատանքներն առաջին հերթին։ Ի վերջո, հեռացրեք նաև ձեր ցանկից բոլոր այն նշված հանձնարարությունները, որոնք երկար ժամանակ զուտ զբաղեցնում են տեղ։  

3․ Բաժանեք ձեր օրը ժամանակահատվածների։ 
Մենք բոլորս արդյունավետ ենք օրվա տարբեր ժամերին։ Մեր արդյունավետությունը կախված է հենց նրանից, թե ո՞ր աշխատանքը որ ժամին է կատարվում։ Ընդհանուր առմամբ մարդիկ ավելի արդյունավետ աշխատում են առավոտյան ժամերին։ Կատարեք առավոտյան այն աշխատանքը, որը ձեզանից պահանջում է բարձր կենտրոնացվածություն։ Կարևոր է նաև բաժանել ձեր օրը որոշ ժամանակահատվածների։ Ես օրինակ՝ բաշխում եմ իմ օրը 3-4 հատվածի։ Առավոտյան զբաղվում եմ որոշակի տարրական հարցերով՝ վարչական կամ կազմակերպչական, մի փոքր ավելի ուշ լուծում ընթացիկ մեկ կամ երկու խնդիր։ Կեսօրից հետո կենտրոնանում եմ մշակման կամ պլանավորման վրա։ Երեկոյան ժամանակահատվածն արդյունավետ օգտագործում սոցցանցերում բիզնեսի վերաբերյալ նյութեր մշակելու ուղղությամբ։  

4․ Զբաղվեք մարդկային ռեսուրսներով 
Մենք հաճաք այնքան շատ ենք տարված ընթացիկ աշխատանքով , որ չենք կարողանում զբաղվել ապագայում մեզ անհրաժեշտ ռեսուրսներով։ Ռեսուրս ընտրելիս առաջնորդվեք նրանով, որ կցանկանայիք հանձնարարել մեկ ուրիշին ձեր աշխատանքի գոնե մեկ մասը։ Քիչ ժամանակ տրամադրելով այսօր՝ վաղը դուք կկարողանաք հանել ձեր վրայից պարտականությունների մի ողջ շարան։
Վստահաբար ժամանակի ընթացքում ձեռքի տակ կուտակվել է տարատեսակ պրոֆիլներից գոյացած ներուժ։ Օրեկան կարգով վերանայեք կուտակված պրոֆիլները։ Առանձնացրեք ձեր օրվա մեջ մեկ ու կես ժամ, թեկուզ առավոտյան թարմ սուրճի պահը, երբ դուք կընթերցեք 1-5 ռեզյումե։ Առանձնացրեք դրանք՝ հետագայում նրանց հետ բանավոր զրուցելու նպատակով։ Բանավոր զրույցները թույլ են տալիս հետագա համագործակցության համար բացահայտել որոշակի մանրամասներ և հատկանիշներ։ 

5. Կազմեք Ձեր ներքին ընթացակարգերը
Դարձրեք սովորույթ ունենալու ներքին ընթացակարգեր։ Որքան էլ բիզնեսը փոքր լինի, մինևնույն է, դուք կատարում եք աշխատանքներ, որոնք պետք է վերահսկվեն որակի տեսանկյունից։ Համագործակցում եք տարբեր մարդկանց հետ և ունեք հաճախորդներ։ Հանձնարարում եք աշխատանքներ և վերահսկում դրանք։ Բոլոր այդ աշխատանքների կատարման ժամանակ նկատվում են թերություններ, որոնք կարող են նվազել լավ մշակված ներքին ընթացակարգերի, կանոնների, բացատրությունների և այլ ուղեկցող նյութերի միջոցով։ Տրամադրեք ժամանակ դրանք մշակելու համար։ Մեկ անգամ այն կազմելով՝ դուք զգալի ազատվում եք աշխատանքային կրկնությունից և բարձրացնում ձեր ներքին կազմակերպվածությունը։ 

6․ Հանձնարարեք եվ պլանավորեք հնարավորինս շատ։  
Սովորեք հանձնարարել։ Սա ևս ժամանակի կառավարման լավագույն մեթոդ է։ Անշուշտ պատասխանատվության զգացողությունը բարձր է, երբ անձնապես վարում ես սեփական բիզնեսը և նախընտրում կատարել աշխատանքն ինքնուրույն՝ վստահ լինելու որակի մեջ։ Բայց պետք է համաձայնել, որ ի վիճակի չեք կատարելու ողջ աշխատանքը մշտապես։ Պետք է սովորել հանձնարարել։ Ձերբազատվելով ամենօրյա տասնյակ հարցերից, դուք հնարավորություն եք ունենում կենտրոնանալու բիզնեսի զարգացման ուղղությունների վրա։
Պլանավորեք աշխատանքների մեծ մասը։ Կազմեք ինչպես կարճաժամկետ, այնպես էլ երկարաժամկետ պլաններ։ Կարող եք կազմել շաբաթական, ամսեկան կամ տարեկան պլաններ՝ ներառելով դրանց մեջ Ձեր կողմից սահմանվող նպատակները․ օրինակ՝ հաճախորդների տեսակը, որոնց հետ պատրաստվում եք համագործակցել, ռեսուրսները, որոնցից ցանկանում եք օգտվել կամ այն փոքր ներդրումները, որոնք պատրաստվում եք կատարել Ձեր բիզնեսում։ Կարող եք պլանավորել այնպիսի փոքր գործեր, ինչպես օրինակ՝ սոցցանցերում Ձեր ակտիվության հաճախականությունը և թեմաները։ Դրանով պայմանավորված է Ձեր շուկան և սպառողների քանակը։ Ի վերջո, որքան ավելի շատ և կանոնավոր եք պլանավորում, այնքան ավելի շատ առիթներ կլինեն դրանք իրագործելու։